Orienda Polylinic

News / កាតបន្ថយការលូតលាស់មិនប្រក្រតីរបស់ទារកក្នុងផ្ទៃ

Sunday, 04 July 2021, 09:50 PM

ភាពមិនប្រក្រតីពីកំណើតមានវត្តមាននៅពេលកើត។ បញ្ហាពិការភាពមួយចំនួនអាចត្រូវបានមើលឃើញភ្លាមបន្ទាប់ពីទារកបានកើតមកដូចជាជើងខ្វេ ឬម្រាមដៃឬម្រាមជើងលើស។ គេអាចត្រូវការការធ្វើតេស្តពិសេសដើម្បីស្វែងរកភាពមិនប្រក្រតីដទៃទៀតដូចជាបេះដូងមិនប្រក្រតី ឬថ្លង់។ ភាពមិនប្រក្រតីពីកំណើតខ្លះមិនត្រូវបានគេកត់សម្គាល់ឃើញទេរហូតដល់ពេលក្រោយមក។

តើអ្វីដែលបណ្តាលឱ្យភាពមិនប្រក្រតីពីកំណើត?

ភាពមិនប្រក្រតីខ្លះកើតមកពីហ្សែន( gene )ដែលចម្លងបន្តពីឪពុកម្ដាយទៅកូន។ ខ្លះទៀតកើតចេញពីបញ្ហាក្រូម៉ូសូម( chromosome )។ មួយចំនួនតូចបង្កឡើងដោយការប៉ះពាល់ទៅនឹងថ្នាំមួយចំនួន ការឆ្លងមេរោគ និងសារធាតុគីមីអំឡុងពេលមានផ្ទៃពោះ។ ប៉ុន្តែភាពច្រើននៃភាពមិនប្រក្រតីពីកំណើតមិនមានមូលហេតុទេ។

តើខ្ញុំអាចធ្វើអ្វីបានមុនពេលឬអំឡុងពេលមានផ្ទៃពោះដើម្បីកាត់បន្ថយហានិភ័យនៃការមានកូនដែលមានភាពមិនប្រក្រតីពីកំណើតខ្លះ?

ភាគច្រើននៃភាពមិនប្រក្រតីពីកំណើតមិនអាចការពារបានទេពីព្រោះយើងមិនដឹងពីមូលហេតុរបស់វា។ ចំពោះភាពមិនប្រក្រតីពីកំណើតមួយចំនួន យើងអាចបន្ថយហានិភ័យបានដោយអនុវត្តតាមជំហានមួយចំនួនដូចជា៖

ទៅជួបជាមួយគ្រូពេទ្យមុនពេលមានផ្ទៃពោះ។
ដឹងពីកត្តាហានិភ័យរបស់អ្នក។
ប្រើវីតាមីនចម្រុះជារៀងរាល់ថ្ងៃមុននិងអំឡុងពេលមានផ្ទៃពោះ។
រក្សាទំងន់និងសុខភាពឱ្យបានល្អ។
ប្រើប្រាស់ថ្នាំដោយប្រុងប្រយ័ត្ន។
ព្យាបាលបញ្ហាសុខភាព មុនពេលមានផ្ទៃពោះ។
កុំប្រើគ្រឿងស្រវឹង ថ្នាំញៀន ឱសថខុសច្បាប់ ឬប្រើឱសថដោយគ្មានមូលហេតុច្បាស់លាស់។
បង្ការការឆ្លងរោគ។
ជៀសវាងរបស់គ្រោះថ្នាក់។

ហេតុអ្វីបានជាខ្ញុំគួរតែទៅជួបពិគ្រោះជាមួយអ្នកជំនាញថែទាំសុខភាពមុនពេលមានផ្ទៃពោះ?

វាជាគំនិតល្អ។ អ្នកអាចទទួលបានដំបូន្មានអំពីរបបអាហារនិងលំហាត់ប្រាណផ្សេងៗពីគ្រូពេទ្យឯកទេសខាងសម្ភពនិងរោគស្រ្តី ឬអ្នកជំនាញថែទាំសុខភាព។ អ្នកអាចពិភាក្សាពីកត្តាដែលបង្កើនហានិភ័យនៃការមានកូនដែលមានភាពមិនប្រក្រតីពីកំណើត។ ប្រសិនបើអ្នកមានបញ្ហាសុខភាពអ្នកអាចពិភាក្សាអំពីការថែទាំពិសេសដែលអ្នកត្រូវការ មុនពេលឬអំឡុងពេលមានផ្ទៃពោះ។

តើកត្តាអ្វីខ្លះដែលបង្កើនហានិភ័យនៃការមានកូនដែលមានភាពមិនប្រក្រតីពីកំណើត?

អ្នកអាចមានការកើនឡើងហានិភ័យនៃការមានកូនដែលមានភាពមិនប្រក្រតីពីកំណើតប្រសិនបើអ្នក៖

មានអាយុច្រើន
ក្នុងគ្រួសារធ្លាប់មានប្រវត្តិ ឬខ្លួនឯងផ្ទាល់មានភាពមិនប្រក្រតីពីកំណើត
មានកូនមានភាពមិនប្រក្រតីកំណើតដែរ
ប្រើថ្នាំមួយចំនួនអំឡុងពេលអ្នកចាប់ផ្តើមពពោះ
មានបញ្ហាសុខភាពដូចជាជំងឺទឹកនោមផ្អែម ឬជំងឺធាត់
ប្រើថ្នាំញៀនឬផឹកគ្រឿងស្រវឹងអំឡុងពេលមានផ្ទៃពោះ
ប្រសិនបើអ្នកមានកត្តាហានិភ័យណាមួយគ្រូពេទ្យឯកទេសខាងសម្ភពនិងរោគស្រ្តី ឬអ្នកឯកទេសថែទាំសុខភាពរបស់អ្នកអាចណែនាំការធ្វើតេស្តពិសេសឬវិធីដទៃទៀតដែលអាចជួយបន្ថយហានិភ័យរបស់អ្នក។ ឧទាហរណ៍៖ប្រសិនបើក្នុងគ្រួសារអ្នកធ្លាប់មានប្រវត្តិ ឬខ្លួនអ្នកផ្ទាល់មានភាពមិនប្រក្រតីកំណើត អ្នកគួរតែធ្វើការប្រឹក្សានិងការធ្វើតេស្តហ្សែន( genetic counseling and testing )។

ហេតុអ្វីបានជាការប្រើវីតាមីនចម្រុះមានសារៈសំខាន់មុននិងអំឡុងពេលមានផ្ទៃពោះ?

ថ្នាំវីតាមីនចម្រុះសំរាប់ស្រ្តីមានផ្ទៃពោះមានវីតាមីននិងជាតិរ៉ែដែលអ្នកត្រូវការអំឡុងពេលមានផ្ទៃពោះដូចជាវីតាមីន A , C និង D អាស៊ីតហ្វូលិក( folic acid )និងសារធាតុរ៉ែដូចជាជាតិ ដែក។ ការទទួលទានអាស៊ីតហ្វូលិក 400 មីក្រូក្រាមរាល់ថ្ងៃយ៉ាងហោចណាស់មួយខែមុនពេលមានផ្ទៃពោះនិងអំឡុងពេលមានផ្ទៃពោះអាចជួយបង្ការពិការភាពពីកំណើតធ្ងន់ធ្ងរ ដែលហៅថា neural tube defects ។ វាគឺជាពិការភាពនៃខួរក្បាលនិងឆ្អឹងខ្នងនៃទារក។ ភាគច្រើននៃសារធាតុវីតាមីនចម្រុះនិង ទឹកដោះគោសំរាប់ស្រ្តីមានផ្ទៃពោះ មានផ្ទុកអាស៊ីតហ្វូលីកពី 400 ទៅ 800 មីក្រូក្រាម។

តើខ្ញុំត្រូវការដឹងអំពីអ្វីខ្លះទាក់ទងនឹងការប្រើថ្នាំនៅពេលមានផ្ទៃពោះ?

ថ្នាំមួយចំនួនធ្វើឱ្យមានភាពមិនប្រក្រតីពីកំណើត។ អ្នកគួរប្រាប់អ្នកដែលចេញឱសថឱ្យអ្នកថា អ្នកមានផ្ទៃពោះឬមានបំណងចង់មានផ្ទៃពោះ។ នេះរួមបញ្ចូលទាំងវេជ្ជបណ្ឌិតដែលអ្នកទៅជួបសម្រាប់ការថែទាំធ្មេញ សុខភាពផ្លូវចិត្ត ឬ បញ្ហាមិនទាក់ទងនឹងផ្ទៃពោះផ្សេងទៀត។ ដូចគ្នានេះផងដែរ សូមបញ្ជាក់ជាមួយគ្រូពេទ្យឯកទេសខាងសម្ភពនិងរោគស្រ្តី ឬអ្នកឯកទេសថែទាំសុខភាពរបស់អ្នកមុនពេលប្រើថ្នាំដែលគ្មានវេជ្ជបញ្ជាដូចជាថ្នាំបំបាត់ការឈឺចាប់ ថ្នាំបញ្ចុះលាមក ថ្នាំត្រជាក់ ថ្នាំបំបាត់អាឡែរហ្សី វីតាមីន ឱសថបុរាណ និង ថ្នាំព្យាបាលស្បែក។

តើភាពធាត់អាចប៉ះពាល់ដល់ការមានផ្ទៃពោះរបស់ខ្ញុំយ៉ាងដូចម្តេច?

ស្ត្រីដែលធាត់ (មានសន្ទស្សន៍នៃទម្ងន់ខ្លួន body mass index [ BMI ] ពី 30 ឬខ្ពស់ជាងនេះ) នៅពេលដែលពួកគេមានផ្ទៃពោះ មានការកើនឡើងហានិភ័យនៃការមានកូនដែលមានភាពមិនប្រក្រតីពីកំណើត ជាងស្ត្រីដែលមានទម្ងន់ធម្មតា។ ក្នុងចំណោមបញ្ហាមិនប្រក្រតីទាំងនោះគឺភាពមិនប្រក្រតីនៃសរសៃប្រសាទ neural tube defects បេះដូងមិនប្រក្រតី និងឆែបក្រអូមមាត់ ។ ប្រសិនបើអ្នកកំពុងរៀបចំផែនការមានផ្ទៃពោះ វិធីល្អបំផុតដើម្បីបង្ការបញ្ហាដែលបណ្តាលមកពីការធាត់គឺត្រូវសម្រកទំងន់អោយបានធម្មតាមុនពេលអ្នកមានផ្ទៃពោះ។

ខ្ញុំមានបញ្ហាសុខភាពមួយចំនួន។ ហេតុអ្វីបានជាការនិយាយប្រាប់គ្រូពេទ្យឯកទេសខាងសម្ភពនិងរោគស្រ្តី ឬ អ្នកឯកទេសថែទាំសុខភាពមានសារៈសំខាន់បើខ្ញុំគិតចង់មានផ្ទៃពោះ?

បញ្ហាសុខភាពមួយចំនួនដូចជាជំងឺទឹកនោមផ្អែម ជំងឺលើសឈាម និង ជំងឺប្រកាច់អាចបង្កើនហានិភ័យនៃការមានទារកដែលមានភាពមិនប្រក្រតីពីកំណើត ។ ប្រសិនបើអ្នកមានជម្ងឺ សូមទៅជួបគ្រូពេទ្យឯកទេសខាងសម្ភពនិងរោគស្រ្តី ឬ គ្រូពេទ្យជំនាញដទៃទៀតដើម្បីពិភាក្សាពីការផ្លាស់ប្តូរដែលអ្នកត្រូវការដើម្បីគ្រប់គ្រងរបបអាហារ ថ្នាំផ្សេងៗរបស់អ្នកឱ្យបានល្អមុនពេលអ្នកព្យាយាមមានកូន។

ហេតុអ្វីបានជាវាសំខាន់ចំពោះខ្ញុំក្នុងការមិនផឹកស្រាអំឡុងពេលមានផ្ទៃពោះ?

ជាតិអាល់កុលអាចរំខានដល់ការលូតលាស់ធម្មតារបស់ទារកនិងបណ្តាលឱ្យមានពិការភាពពីកំណើត។ នៅពេលស្ត្រីផឹកស្រាក្នុងកំឡុងពេលមានផ្ទៃពោះទារករបស់នាងអាចមានពិការភាពទៅលើកាយសម្បទា បញ្ញាស្មារតី អាកប្បកិរិយា និងការសិក្សាដែលអាចមានរយៈពេលពេញមួយជីវិត។ កុំផឹកស្រាអ្វីទាំងអស់ជាការល្អបំផុតក្នុងពេលមានផ្ទៃពោះ។ ប្រសិនបើអ្នកពិបាកបញ្ឈប់អ្នកគួរតែនិយាយជាមួយគ្រូពេទ្យឯកទេសខាងសម្ភពនិងរោគស្រ្តី ឬអ្នកជំនាញខាងសុខភាពផ្សេងទៀត ។

តើការប្រើប្រាស់ថ្នាំញៀនប៉ះពាល់ផ្ទៃពោះរបស់ខ្ញុំដោយរបៀបណា?

ការប្រើសារធាតុរួមមានហេរ៉ូអ៊ីន កូកាអ៊ីន មេតំហ្វេតាមីន និងថ្នាំដែលប្រើដោយគ្មានមូលហេតុច្បាស់លាស់គឺជាបញ្ហាធំ ។ ការប្រើគ្រឿងញៀន ក្នុងពេលចាប់ផ្តើមមានផ្ទៃពោះ អាចបណ្តាលឱ្យមានភាពមិនប្រក្រតីពីកំណើត និងរលូតកូន។ ក្នុងអំឡុងពេលប៉ុន្មានសប្តាហ៍ក្រោយនៃការមានផ្ទៃពោះ ថ្នាំញៀន អាចរំខានដល់ការលូតលាស់ទារកនិងបណ្តាលឱ្យកើតមិនគ្រប់ខែ និង ការគភ៌ស្លាប់ក្នុងផ្ទៃ ។ ទារកដែលកើតពីស្ត្រីដែលប្រើថ្នាំញៀនខុសច្បាប់អំឡុងពេលមានផ្ទៃពោះអាចត្រូវការការថែទាំពិសេសបន្ទាប់ពីកើត។

តើកញ្ឆាអាចប៉ះពាល់ដល់ផ្ទៃពោះរបស់ខ្ញុំឬទេ?

ការប្រើកញ្ឆាអំឡុងពេលមានផ្ទៃពោះធ្វើឱ្យមានបញ្ហាអាកប្បកិរិយានិងការផ្ចង់ស្មារតីរបស់កុមារ។ កញ្ឆាអាចបង្កើនហានិភ័យនៃការស្លាប់កូនក្នុងផ្ទៃ និង ហានិភ័យដែលទារកនឹងមានមាឌតូចជាងទារកធម្មតា។ វេជ្ជបណ្ឌិតឯកទេសសម្ភព ណែនាំឱ្យស្ត្រីមានផ្ទៃពោះ និង អ្នកដែលចង់មានផ្ទៃពោះមិនប្រើកញ្ឆាឡើយ។ គ្រូពេទ្យឯកទេសខាងសម្ភពនិងរោគស្រ្តី ឬអ្នកជំនាញខាងសុខភាពផ្សេងទៀតរបស់អ្នកអាចពិភាក្សាការព្យាបាលផ្សេងៗដែលនឹងមានសុវត្ថិភាពសម្រាប់ទារករបស់អ្នក។

តើថ្នាំអាភៀនOpioidsប៉ះពាល់ផ្ទៃពោះរបស់ខ្ញុំដោយរបៀបណា?

ថ្នាំ Opioids ដែលត្រូវបានគេស្គាល់ផងដែរថាអាភៀនគឺជាប្រភេទឱសថដែលបន្ថយការឈឺចាប់។ វេជ្ជបណ្ឌិតអាចចេញវេជ្ជបញ្ជាថ្នាំអាភៀនសម្រាប់អ្នកដែលបានធ្វើការវះកាត់, ព្យាបាលធ្មេញឬរបួស។ ថ្នាំ Opioids ដែលមានវេជ្ជបញ្ជាមានដូចជា oxycodone , hydromorphone , hydrocodone , and codeine ។ នៅពេលដែលប្រើថ្នាំក្រោមការណែនាំរបស់គ្រូពេទ្យ ថ្នាំ Opioids មានសុវត្ថិភាពសម្រាប់អ្នកនិងទារករបស់អ្នក។ វាជាការសំខាន់ណាស់ក្នុងការប្រើថ្នាំតាមវេជ្ជបញ្ជា។ មនុស្សភាគច្រើនដែលប្រើប្រាស់ថ្នាំ Opioids ដែលមានវេជ្ជបញ្ជា មិនមានបញ្ហាក្នុងការបញ្ឈប់ការប្រើប្រាស់នោះទេ ប៉ុន្តែមនុស្សមួយចំនួនវិវត្តទៅការញៀន។ ការប្រើប្រាស់ថ្នាំ Opioids ក្នុងអំឡុងពេលមានផ្ទៃពោះអាចបង្កើនហានិភ័យធ្ងន់ធ្ងរដែលរួមមានការកើតមិនគ្រប់ខែ ការស្លាប់កូនក្នុងផ្ទៃ និងបញ្ហាទាក់ទងនឹងសុកនិងការលូតលាស់គភ៌។

តើខ្ញុំគួរតែព្រួយបារម្ភពីការឆ្លងរោគអ្វីខ្លះ ហើយតើខ្ញុំអាចកាត់បន្ថយការប្រឈមមុខនឹងការឆ្លងរោគបានយ៉ាងដូចម្តេចអំឡុងពេលមានផ្ទៃពោះ?

ការឆ្លងមេរោគមួយចំនួនអាចបង្កើនហានិភ័យនៃពិការភាព និងបញ្ហាដទៃទៀតក្នុងអំឡុងពេលមានផ្ទៃពោះសម្រាប់អ្នកនិងទារកដែលកំពុងលូតលាស់របស់អ្នក:

ជំងឺស្អូច Rubella គឺជាការឆ្លងវីរុសដែលបណ្តាលអោយមានកន្ទួលតូចៗនិងមានគ្រុនក្តៅតិចៗ។ ការមានជម្ងឺស្អូចក្នុងអំឡុងពេលមានផ្ទៃពោះអាចបណ្តាលឱ្យរលូតកូន ឬ ធ្វើឱ្យថ្លង់ ពិការបញ្ញាស្មារតី បេះដូងមិនប្រក្រតី និងពិការភ្នែក។ គេមានវ៉ាក់សាំងប្រឆាំងនឹងជំងឺស្អូចប៉ុន្តែវាមិនត្រូវបានណែនាំឱ្យប្រើចំពោះស្ត្រីមានផ្ទៃពោះនោះទេ។ ប្រសិនបើអ្នកមិនទាន់មានជំងឺនេះឬមិនទាន់ចាក់វ៉ាក់សាំងនោះទេ អ្នកគួរតែចាក់វ៉ាក់សាំងប្រឆាំងនឹងជំងឺនេះនិងរង់ចាំយ៉ាងហោចណាស់មួយខែមុនពេលមានផ្ទៃពោះ។

ជំងឺព្រូនឆ្មា Toxoplasmosis គឺជាជំងឺមួយដែលបណ្តាលមកពីប៉ារ៉ាសិតដែលរស់នៅក្នុងដី។ អ្នកអាចឆ្លងមេរោគនេះដោយការញ៉ាំសាច់ឆៅឬចម្អិនមិនឆ្អិនល្អ បន្លែដែលមិនបានលាងស្អាត ឬ តាមរយៈការប៉ះពាល់ជាមួយលាមកសត្វជាពិសេសសត្វឆ្មាដែលចេញក្រៅផ្ទះ។ ប្រសិនបើអ្នកឆ្លងមេរោគនេះជាលើកដំបូងខណៈពេលដែលអ្នកកំពុងមានផ្ទៃពោះ អ្នកអាចចម្លងជំងឺនេះទៅទារករបស់អ្នក។ ជំងឺព្រូនឆ្មាអាចបណ្តាលឱ្យកូនមានពិការភាពដូចជាថ្លង់ ពិការភ្នែក និងពិការបញ្ញស្មារតី ។ ត្រូវប្រាកដថាអ្នកញ៉ាំសាច់ឆ្អិនល្អហើយពាក់ស្រោមដៃនៅពេលថែសួន ឬប៉ះពាល់បន្លែមិនបានលាង។ ប្រសិនបើអ្នកមានឆ្មាសូមឱ្យអ្នកដទៃកើបលាមកវា។ ប្រសិនបើអ្នកត្រូវតែកើបលាមកដោយខ្លួនឯង វាសូមប្រើស្រោមដៃនិងលាងដៃអោយបានស្អាតក្រោយពីកើមរួច។

ជំងឺកាមរោគ Sexually transmitted infections អាចបណា្តលឱ្យមានពិការភាពពីកំណើតធ្ងន់ធ្ងរ។ ការព្យាបាលជំងឺកាមរោគមុនពេលអ្នកមានផ្ទៃពោះអាចការពារឬបន្ថយគ្រោះថ្នាក់ដល់ទារក។

ជំងឺ Cytomegalovirus ( CMV )គឺជាការឆ្លងវីរុស។ ការឆ្លងមេរោគ CMV ភាគច្រើនមិនបង្កឱ្យមានបញ្ហាធ្ងន់ធ្ងរទេ។ ប្រសិនបើអ្នកបានឆ្លងមេរោគនេះជាលើកដំបូងនៅពេលអ្នកមានផ្ទៃពោះ CMV អាចឆ្លងទៅទារក។ ក្នុងករណីខ្លះការឆ្លងអាចបណ្តាលឱ្យមានពិការបញ្ញាស្មារតី ការថ្លង់ និងពិការភ្នែក ។ CMV អាចឆ្លងតាមរយៈការប៉ះពាល់ទឹកនោមរបស់កុមារដែលមានមេរោគ ឬវត្ថុរាវពីក្នុងខ្លួនផ្សេងទៀត។ ស្ត្រីមានផ្ទៃពោះដែលធ្វើការជាមួយកុមារតូចៗដូចជាបុគ្គលិកថែទាំកុមារ ឬបុគ្គលិកសុខាភិបាលគួរតែមានវិធានការដើម្បីការពារការឆ្លងរួមមានការពាក់ស្រោមដៃនៅពេលផ្លាស់ប្តូរក្រណាត់កន្ទប។ ការលាងដៃញឹកញាប់ក៏ត្រូវបានណែនាំផងដែរ។ ស្ត្រីមានផ្ទៃពោះដែលមានកូនតូចៗនៅផ្ទះក៏ប្រឈមមុខដែរហើយគួរអនុវត្តតាមជំហានទាំងនេះ។

តើខ្ញុំត្រូវប្រុងប្រយ័ត្នអ្វីខ្លះដើម្បីកំហិតការប៉ះពាល់នឹងភ្នាក់ងារដែលអាចបណ្តាលឱ្យមានភាពមិនប្រក្រតីពីកំណើត?

ការប្រុងប្រយ័ត្នមួយចំនួនត្រូវបានណែនាំសម្រាប់ស្ត្រីមានផ្ទៃពោះទាំងអស់រួមមានៈ

កំណត់ការប៉ះពាល់ទៅនឹងបារតដោយមិនញ៉ាំត្រីឆ្លាម ត្រីដាវ swordfish ត្រី king mackerel ឬត្រី tilefish ។ កំណត់ការបរិភោគត្រីធូណា white ( albacore ) tuna ត្រឹម ១ ខាំកន្លះ ( ១៥០ ក្រាម) ក្នុងមួយសប្ដាហ៍។ អ្នកមិនចាំបាច់តមត្រីទាំងអស់ក្នុងពេលមានផ្ទៃពោះទេ។ ត្រី និង ពពួកគ្រឿងសមុទ្រ គឺជាអាហារបំប៉នដែលមានសារធាតុចិញ្ចឹមសំខាន់ៗសម្រាប់ស្ត្រីមានផ្ទៃពោះនិងទារកដែលកំពុងលូតលាស់របស់នាង។ ត្រូវប្រាកដថាបរិភោគត្រីដែលមានជាតិបារតតិចនិងពពួកគ្រឿងសមុទ្រ យ៉ាងហោចណាស់ ៣ ខាំ ( ៣០០ ក្រាម) ក្នុងមួយសប្តាហ៍។

ចៀសវាងការប៉ះពាល់សំណ។ ជាតិសំណមាននៅក្នុងថ្នាំពណ៌ចាស់ៗ សមា្ភរៈសំណង់ ឱសថបុរាណ និងរបស់របរផ្សេងៗដែលផលិតនៅប្រទេសក្រៅដូចជាគ្រឿងអលង្ការនិងភាជន៍។

ជៀសវាងការទទួលទានវីតាមីនអេ A កម្រិតខ្ពស់។ កម្រិតខ្ពស់នៃវីតាមីនអេត្រូវបានផ្សារភ្ជាប់ទៅនឹងពិការភាពធ្ងន់ធ្ងរ។ អ្នកមិនគួរទទួលទានវីតាមីនអេលើសពី 10,000 ឯកតាក្នុងមួយថ្ងៃទេ។